Ne nuk vdesim kurre - Matt Fraser

“Ne nuk vdesim kurrë”, një libër mbi sekretet e jetës pas vdekjes

Vdekja është një dukuri e frikshme. Për të gjallët, ajo është një kufi, përtej të cilit mbretëron e panjohura. Megjithatë, ka gjithnjë e më shumë prova shkencore për ekzistencën e jetës pas vdekjes. Një jetë e ndryshme, por reale.

Kur largohemi nga bota e të gjallëve, vetë thelbi i asaj që jemi, të lirë nga kufizimet e guaskës sonë mishtore, vazhdon të ekzistojë në botën e padukshme, e nganjëherë të komunikojë me botën e dukshme. Skeptikët thonë se jeta pas vdekjes nuk është një realitet, por më tepër një besim i thjeshtë i bazuar tek dëshira e thellë e të gjallëve për të mbajtur kontaktin me njerëzit që i donin ose i admironin.

Në realitet, ndodh shpeshherë e kundërta: janë të ndjerët, ata që përpiqen të komunikojnë me të gjallët. Në librin “Ne nuk vdesim kurrë”, një bestseller ndërkombëtar, i sjellë edhe në gjuhën shqipe nga shtëpia botuese IRISOFT, nga një mediumët psikikë më të famshëm në SHBA dhe jo vetëm, Matt Fraser, ofron një perspektivë unike mbi jetën e përtejme si një mbretëri energjie të pastër, e cila bashkëjeton përkrah botës sonë fizike.

Matt beson se shpirtrat e të dashurve të vdekur vazhdojnë të krijojnë lidhje të thella me ne, se ata të janë aftë të ofrojnë ngushëllim dhe ndihmë përtej kufizimeve të kohës dhe hapësirës. Fraser rrëfen përvojat e tij si një medium që lidhet me shpirtrat që kanë ndërruar jetë.

Ai ndan me lexuesin të dhëna shumë intriguese mbi kalimin nga jeta në vdekje, komunikimin me jetën e përtejme, dhe se si të kuptuarit e kësaj ekzistence mund të nxisë rritjen personal dhe domethënien e kësaj jete, një nga dilemat e përhershme të njeriut.

Po ashtu, ai ofron teknika për të nxitur lidhjet shpirtërore, si përqafimin e pozitivitetin, vizualizimin e vegimeve dhe kujdesin e përhershëm për veten. Fraser thotë se kur shpirtrat kalojnë në botën tjetër, ata përjetojnë një periudhë vetë-analize, duke i rivlerësuar jetët e tyre tokësore dhe fituar në fund një këndvështrim të ri mbi veprimet e tyre, duke lënë mënjanë çdo ndjenjë të mbetur pendese apo pakënaqësie.

Gjatë fazës së rishikimit të jetës së tyre tokësore, shpirtrat fitojnë një kuptim dhe perspektivë më të thellë në lidhje me ngjarjet që janë përjetuar. Ata nisin të kuptojnë ndikimin e gjerë që kanë pasur veprimet e tyre tek të tjerët.

Shpesh shpirtrat përvetësojnë një perspektivë të karakterizuar nga empatia dhe depërtimi tek shpirti i tjetrit, ndërsa heqin dorë nga çdo ndjenjë e mbetur keqardhjeje ose hidhërimi që mund të ushqejnë ndaj vetes ose të tjerëve.

Matt Fraser është i bindur se krijimi i një lidhjeje me jetën e përtejme, mund të ndihmojë jo pak në zhvillimin individual dhe shpirtëror të një personi. Ajo mund të ofrojë ngushëllim, t’i ndihmojë individët të ecin përtej pikëllimit të tyre të momentit dhe t’u japë atyre një perspektivë të re që i fuqizon ata të kapërcejnë pikëllimin nga humbja e të afërmit, të shërojnë plagët e vjetra dhe të kenë një jetë më të përmbushur nga ai moment e në vazhdim.

Të kuptuarit se ata që kemi humbur, mbeten në një fare mënyre me ne, dhe kanë gjetur paqe në atë dimensionin tjetër, mund ta lehtësojë hidhërimin e madh që shkaktoi largimi i tyre fizik nga kjo botë.

Në këtë libër, Fraser e vë gjithashtu theksin tek funksioni udhëheqës i shpirtrave për ata që jetojnë në Tokë. Ato ofrojnë inkurajim, udhëzim dhe frymëzim për të dashurit e tyre, duke i udhëhequr ata në një rrugë drejt zhvillimit personal, gëzimit dhe arritjes së aspiratave të tyre. Prandaj duke i kushtuar vëmendje mençurisë së dhënë nga bota shpirtërore, njerëzit mund të fitojnë njohuri të thella, dhe të sjellin ndryshime pozitive në jetën e tyre.

Përqafimi i parimeve që lidhen me jetën e përtejme, siç janë dhembshuria absolute, falja e të tjerëve dhe hedhja pas krahëve e inateve dhe ankesave të dikurshme, mund të transformojë rrënjësisht pikëpamjen e një individi. Jeta e përtejme, karakterizohet nga një mjedis i mbushur me dashuri të pafundme, falje dhe potencial për çlirim.

Shpirtrat zotërojnë një perspektivë më të gjerë dhe më të ndjeshme, të pa ngarkuar nga përkatësitë dhe paragjykimet e vdekshme. Në bisedat e tij me ata që kanë ndërruar jetë, Fraser vëren se perspektiva e tyre mbi jetën këtu në Tokë, bëhet më e gjerë dhe më e dhembshur pas kalimit të tyre në botën tjetër.

Vetë historia personale e autorit të librit, nënvizon rëndësinë e jashtëzakonshme të zbulimit të aftësive tona të lindura dhe të përkushtimit të tyre në shërbim të të tjerëve. Dëshira e tij për të ndihmuar të tjerët, e çoi fillimisht drejt një karriere si mjek në shërbimin e urgjencës.

Atje ai zbuloi dhe përqafoi dhuntinë e tij dalluese, e cila i lejoi të angazhohej në biseda me botën shpirtërore, duke zbuluar vokacionin e tij të vërtetë: ofrimin e ngushëllimit dhe zgjidhjeve për ata që ishin në zi për humbjen e të dashurve të tyre.

Matt e përmend vazhdimisht në libër faktin se shpirtrat nga bota e përtejshme, e theksojnë rëndësinë që ka të qënit origjinalë në jetën tokësore, si dhe të shfrytëzimin maksimal të kohës. Ai merr shpesh komunikime nga të ndjerët, të cilat shprehin dëshira apo rekomandime urgjente për të afërmit që janë ende gjallë.

Ata i frymëzojnë të dashurit e tyre që të angazhohen plotësisht në jetën e tyre tokësore, të ndjekin aspiratat e tyre dhe të vlerësojnë çdo moment, të vetëdijshëm për faktin se koha jonë në Tokë është e kufizuar. Fraser shprehet ndër të tjera se kultivimi i një mendësie pozitive dhe të mirënjohjes, si dhe çlirimi aktiv i emocioneve negative, krijojnë një mjedis më të hapur për komunikim shpirtëror.

Dhe ndërsa rrisim frekuencën tonë vibruese, bëhemi më të ndjeshëm ndaj energjive delikate të botës së përtejme, gjë që përmirëson edhe aftësinë tonë për të perceptuar komunikimet nga ata që kanë ndërruar jetë. Meditimi dhe praktika e qëllimshme e zëvendësimit të mendimeve pesimiste me ato optimiste, janë metoda shumë efektive.

Në këtë mënyrë, ne nxisim një transformim të dobishëm në energjinë tonë të brendshme. Ky ndryshim, e rrit aftësinë tonë për të kapërcyer barrierat dhe e forcon lidhjen tonë me sferën përtej fizikes, duke rritur kështu gatishmërinë tonë ndaj komunikimeve nga ana tjetër.

Matt Fraser beson se duke iu përkushtuar vetes, duke kërkuar këshilla dhe duke kërkuar ndihmën e entiteteve të shenjta dhe individëve të vlerësuar, një person mund të forcojë lidhjet e tij shpirtërore. Autori e portretizon lutjen jo thjesht si akt për të marrë favore të caktuara, por si një praktikë për t’u përshtatur me hyjnoren, duke kërkuar udhëzim dhe mbështetje nga një burim transcendental.

Ai mbështet idenë se mendimet, emocionet dhe energjitë tona formojnë realitetin tonë, duke nxitur përvoja të ngjashme. Mediumi i famshëm, i motivon dëgjuesit e tij të parashikojnë qëllimet e tyre dhe t’i arrijnë. Autori i këtij libri, nënvizon gjithashtu rëndësinë e madhe që ka kujdesi për veten dhe ruajtja e një ekuilibri harmonik të energjisë personale për të mbështetur zhvillimin e vazhdueshëm shpirtëror.

Shëndeti ynë shpirtëror, lulëzon kur kujdesemi për të me vëmendje, mbështetje dhe relaksim, ashtu siç trupat tanë fizikë kanë nevojë për ushqim për të funksionuar. Duke e shtuar kujdesin për veten dhe duke vendosur kufij të fortë, ne ruajmë vitalitetin tonë dhe i hapim rrugën një lidhjeje shpirtërore më të thellë.

Pushimet e rregullta, rrethimi i vetes me natyrën dhe shmangia e lodhjes, janë praktika thelbësore për të mbajtur të pastër dhe të fortë vitalitetin tonë. Këto praktika, ndihmojnë në ripërtëritjen e energjisë sonë, pastrimin e negativitetit dhe ri-përshtatjen e vetes me shpirtin tonë të brendshëm. Vendosja e kufijve, krijimi i barrierave mbrojtëse dhe mbështetja e vetvetes, janë thelbësore për mbrojtjen kundër energjive të dëmshme.

Fraser shpjegon se shpirtrat, të çliruar nga kufizimet trupore, shkojnë shpesh drejt vendeve që janë të pasura me kujtime të jetës së tyre tokësore. Këto vende ofrojnë për ta një hapësirë që të meditojnë për kujtimet e çmuara dhe të ruajnë lidhjet me të dashurit që janë ende me ne.

Për këtë arsye, objektet me vlerë sentimentale, si trashëgimitë familjare dhe kujtimet, mund të veprojnë si një urë që bashkon të gjallët me ata që kanë ndërruar jetë. Gjurmët e tyre energjike unike, mund të shkaktojnë kujtime dhe herë pas here të ngulitin një ndjenjë të pranisë së dallueshme të personit.

Fraser komunikon shpesh me shpirtrat gjatë seancave të tij, dhe ata e pranojnë dhe vlerësojnë faktin që anëtarët e gjallë të familjeve së tyre, i vlerësojnë shumë sendet dhe kujtimet e tyre të prekshme, si një mënyrë për të nderuar kujtimin e tyre, edhe pse kjo mund të ketë qenë në kundërshtim me dëshirat e tyre para se të vdisnin.

Gjithsesi, mediumi i këshillon njerëzit të çlirohen nga çdo ndjenje detyrimi apo faji që lidhet me mos ruajtjen të paprekur të sendeve të familjarit të ndjerë. Ai nënvizon rëndësinë më të madhe që ka vlerësimi i lidhjeve shpirtërore dhe i dashurisë që është ndarë, në vend se të fiksohen pas sendeve materiale, si një mënyrë për t’i bërë homazh kujtimit të tyre.

Libri “Ne nuk vdesim kurrë”, është një ftesë për cilindo jo thjesht për një jetë më shpirtërore, por për një jetë të orientuar më qartë drejt së mirës, pozitives dhe vetë-përmirësimit të vazhdueshëm. Por mbi të gjitha, Matt Fraser na fton që të dalim përtej “burgut” të dhimbjes për të dashurit që janë larguar apo do të largohen një ditë nga kjo botë, dhe për të parë ekzistencën tonë shpirtërore për atë që është vërtetë: një energji e përjetshme, që në një moment vetëm sa ndërron formë por që nuk zhduket asnjëherë.